Gen 16 | BNP | STEP | E Sarai, e girihine Abram, i uka ma i poda a koma, pali a vorakato na ngatavine o Egipto i leho vona, a rana e Hagar.

Genesis 16

E Hagar e Ismael

1 E Sarai, e girihine Abram, i uka ma i poda a koma, pali a vorakato na ngatavine o Egipto i leho vona, a rana e Hagar. 2 Lakea e Sarai i takia e Abram, i ta maea, “E BAKOVI DAGI i uka ma i ngaru iau ga tahoka a koma. O vano o mahita turana a vora ngatavine nau, ge tahoka a koma. Muri ga paua a koma, ga vakabele a kabu tarua vona.”

E Abram i longo vona a ngavane Sarai. 3 Lakea e Sarai i bolea a vorakato vona, a ngatavine o Egipto, i habia ne girihina i parangi vona. Na tahuna iea, e Abram i made pali vonga o Kenan na pida i ravulu. 4 E Abram i mahita turana e Hagar, muri i singou.

Na tahuna e Hagar i lohoka vona i singou, i vakatubu ni tagege i biu a ngatavine dagi vona e Sarai. 5 Lakea e Sarai i tahatea e Abram, i ta maea, “Ioe a vuhuna ra a nimadihi i bele nau. A habia vomu a vorakato nau ngane i singou, i tagege hateka. Pali e BAKOVI DAGI kunana bara i vara tarua ma.”

6 E Abram i koli mulea a nitane girihina, i ta maea, “A vorakato vomu ngane i made na limamu. O rata virihia vona a ra maki o ngarua vona.”

I vakatubu vonga, e Sarai i tepua e Hagar, muri e Hagar i ha.

7 Na dala lakea o Sur, tabukoi na naru kiroko na tabeke i ngeki, i luve taho e Hagar vonga a agelo ne BAKOVI DAGI. 8 Lakea a agelo i ta maea, “Hagar, ioe a vora ne Sarai, o valai vai? Pali ngane go loko vai?”

E Hagar i koli, i ta maea, “Iau a ha na ngatavine dagi nau, e Sarai.”

9 Lakea a agelo ne BAKOVI DAGI i tono mulea i takia, “O hamule mai e kabe Sarai, naha ni tagege tabu, o longototoa a ngavana.” 10 Lakea a agelo ne BAKOVI DAGI i voro polo liu a nita, i ta maea, “Ga vakabele ge kupo e huriki a hamomu, bara ni keri ni gi.”

11 A agelo ne BAKOVI DAGI i taki tabua e Hagar,

“Ngane o singou,
bara o podea a bakovi,
o vunua a rana e Ismael, ^{▼▼(16:11)E Ismael na nita Hibru i manga ‘a Vure i longo.’}
a vuhuna e BAKOVI DAGI i longoa a nitangi vomu.
12 E tumu bara i mata ringangi manga a donki,
bara i tepu e huriki lobo.
E huriki lobo ranga bara ri tepua.
A nimade vona turana e huriki a viri vona i uka ma ge kamumu.”
13 E Hagar i vunua a rana e BAKOVI DAGI ra i ta turana, “A Vure i matai iau.” A vuhuna i ta maea, “A masia pali a Viri i matai iau. ^{▼▼(16:13)‘A Viri i matai iau’ na nita Hibru i manga e ‘Bia Lahai Roi.’} 14 Lakea ni gale liu ra lomu iea, “a naru na Viri Mahuri i matai iau.” A naru iea i tabana na kurukuruna e Kades e Bered. 15 ^cMuri, e Hagar i podea e tune Abram bakovi, lakea e Abram i vunua e Ismael. 16 E Abram i tahoka a pida i 86 na tahuna e Hagar i podea e Ismael.